گیزله نن سرلار

 

آنگمایارن کاته سننگ پکرینگی

اشتمه یارسنگ سنده  یؤرگ دویغی می

مؤنگ لرچه یؤرگ دن سؤیشسگ ده بیز

سن سرینگ گیزله یانگ منده سؤیگی می

 

اکیمیز هم دؤرمیش آدلی گامی ده

نابلّی گلجگه دورمانی باریارس

بیرگ بیرگمیزه آنگلاشما درگ

قاهار دئر اویکی نی برگ اونگه سوریارس

 

یادیمیزدان چقیار آوادان گچمیش

آلیب گلیارس اوی لارمیزه قایغی نی

دورمیش دا شادلغینگ سرین تابمانی

سؤیگی سیز چؤل لرده گؤریارس گورگی نی

 

گِل ارته قویمایلینگ باخیت لی دورمیشی

باخیت دئر دوشنشسگ بیرگ بیرگه

ایچلارده دِولمان آیدلسا اوی لار

ملهم دئر هر زاد دان اینجان یؤرگه

قوشغی

 

قوشغی دیلیانی پاش بولان سرلار

دویغی لار یوقالیب کونگل خوشلاندا

قوشغی دیلیانی سایلانان سرلار

پکرلانگ جمع بولیب عقلنگ ایشلانده

 

قوشغی دیلیانی سولانگ آوازی

داغدان اینب شارلاب یابدان آقاندا

قوشغی دیلیانی آدام نیازی

گوره دأل ده ایسم کونگله باقاندا

 

قوشغی دیلیانی بیر سس لی پریاد

قاریب لار خور قالیب سمریسه ظالیم

قوشغی دیلیانی هر زادا شایاد

دل لی لار لال بولیب صم قالسا عالیم

 

قوشغی دیلیانی قایتالاب گورمگ

آداملار اؤزینی دورمیش یوزنده

قوشغی دیلیانی قاناتنگ گرمگ

سؤیگی آسمانندا سیلاغ دؤزنده

جادلی جعبا

 

گپسیزجه اوتیرلار بیر اویده اویشیب

گؤزلار گونگیب دئر دینگه بیر یانگا

قولاق لار تیزلانیب یالنگیز بیر سسه

آلدانیار اووی لار هم جادلی جعبا

 

عقلّی هم جعبه آنگلّی هم شول

سهلچه سؤزنه شک ادیان هم یوق

بویرقی قویلماز هیچ قاچان یرده

عقلیم کأن دیان لار قارشی چقانوق

 

گؤیا کی دویغی دا بولیب دئر یسیر

اینجی ماسی دینگه جعبانگ الینده

آغلادسا آغلایب گولدئرسه گولیب

تماشا ایلاب اوتیر سالغین  چؤلنده

 

جعبه ده گورلیان قالپا صوراتنگ

آرتیب دئر انسان دان ماقامی اُرنی

کتاب اُقیماق لیق ورزش ادمگ لیگ

سالغنا چابماغا بریب دئر یرنی

 

بلم دن خایرلان اوسیشدن نب گور

یونه هر بیر زاد دا آرالیق ساقلا

قاراش سیز اویلاندا ارکین بولیب گز

جاهان دا اُرننگ تاب ،گچمشنگ یوقلا

آوچی لار آولار

 

هر کشینگ عالمه بار دئر قاریشی

بارلیق دان دؤشنشی گلجگ دن اویی

بیری سین دویرسا بیر دوم چؤرگ

آچ گؤزلار دؤیمایار بیر عمر سایی

 

کألار تاپیب بیلسه گونلیگ آذقین

آلکیش لاب تانگری سین کوب شکر قیلیار

دورمیشدا دیکایسا یقیجاق چاتما

دنیا دا اوزینی انگ باختلی بلیار

 

یونه قارشی سندا ینه بیریسی

سولیگ دی سوریب دور ایلننگ قانن

جنگل ده آچ گؤزلی آچ قارن قابلنگ

دیدیب دور آوینی آلیب دور جانن

 

کأ بیری اِم قابلنگ دان قالان سونگ لاری

چینما چملانیب واغتین قارایار

گیتدی دیب بیرن کونگلینگ خوشلاسانگ

توپار توپار یرنه آوچی دوره یار

 

دویار میکا بیر واغت آوچی لانگ قارنی

آمان یاشار میکا علاج سیز آولار

اوچمازمی آسمانا قاپاس دان قوش لار

گیرمزمی زندانا ظلم ادن لار دِولار

 

یاشایش ماغناسین دویبدن یتریار «عاراب خالقننگ قالکنشنا هودرله یان»

یورگ لار  دویانسونگ دیری قالماقدان

جدام آخر بولیب دولاندا صابیر

اوز اچینگ دن دوران ظالیم آداملار

یقسالار اویجنگی دیکسه لر قابیر

یاشایش ماغناسین دویبدن یتریار

 

نامانگ نامه دیگنی دویمادیق چاغانگ

انه انگ  قورساغندا برنده  جانی

بیر عمر وپادار ایشله گن آتانگ

گنا سیز یازیق سیز دوکلسه قانی

یاشایش ماغناسین دویبدن یتریار

 

قوین دیب چاقلانلانگ چقانسونگ  قورت

هامراق دیب اویلاننگ بولانسونگ جلاد

باتر دین کشینگ بولاسا قورکاق

یگیت لار  توساقدا یاشامان آزاد  

یاشایش ماغناسین دویبدن یتر یار

 

بگ باشینگ یاد یرده بولسا  ایغندی

ایماگه زاد تابمان بولاسانگ قالاج

داغلارینگ اوستنده قارلی قشلاردا

قالسانگ یالنگیز لیقدا قارننگ بولسا آج

یاشایش ماغناسین دویبدن یتریار

 

آدام حقوقندان سوزله یان ایل لار

گلیب ظالیم لارا بولسا لار آرقا

سنگ آدینگ دا بولسا تروریست قانخور

جنایات گون گوندن آرتا سا بارخا

یاشایش ماغناسین دویبدن یتریار

 

دوغری  سوزله یان لار ادلسه سورگون

یا طاناب اوستنده اویناسا باشی

تورمه لانگ ایچنده مونگلارچه انسان

غام بولیب چوغیداسا آقدریب یاشی

یاشایش ماغناسین دویبدن یتریار

دوشنش مزلیگ

سویشماگه کوب دئر جاهاندا دلیل

یونه بیز سباب سیز اویکی یاشایارس

دوشنشمانی کاته گؤزل دورمیش دا

«بوز اوستنده ناحاق توزان آرایارس»

کاته یازیق منده کا بولسا سنده

سن منی دویمایانگ من بولسا سنی

یاشایشی گون گوندن سویجدما درگ

کونگل لاری اینجدیب آغردیارس تنی

بیرگ بیرگمیزی یاغشی گورماگه

گویا گورگیج گؤزلر کور بولان یالی

یوق یردن قینچلیق دوردیارس کوب واغت

یورگمیز شاد بولمان قایغی دان دولی

گورلدسنگ هر کیشی بیر زاتدان توقات

بیری اوغیل قیزدان بیری قونگشی دان

بیری باشلیغیندان بیری باشداشدان

بیری پاراخوردان بیری برگی دن

گلینگ دوسلار شیله گؤزل گونلرده

یورگ لاری یوایلینگ قاهار کینه دن

سیلایلینگ المدام بیرگ بیرگی

تأزه دورمیش قوراب گچیب کهنه دن

اویانسا

باختلی دورمیش أرلره اِل یتمه جگ آرزو دأل

قایغی غامدا اِرکلمأن اُمید بیلن اُویانسا

قوجیر غایرات همّتی بیر مکانا اُویشریب

قیلسا توکّل تانگرا ،بلیم عقلا سؤیانسا

اورنمگ دن داش قاچمان بیلسه انسان بؤرجنی

بترمگ ده کوب اِرجل، قؤلداب دورسا آجنی

قولّاریندا جملاسا یگید قوات گویجنی

قاچار یاندان قاریب لیق قالجانگ بولیب دایانسا

یاشایشدان ماقصاد بار یاشلار شونی بیلمه لی

قینچلیقدان قاچمالی دأل اونگا  طاراپ گلمه لی

یالتانماغا یول برمان بیزلر دیزا قالمالی

ینگیش یگیده یتدئرماز  بی پارخ یادا یارانسا

بیرلشیگ دا باخت بار یالنگیزلیقدا ساپا یوق

آغزی آلا لیق بدبختلیق ،جبیس لیگده جپا یوق

ایشه بارسانگ  اگلانمه گلجگ گونه وپا یوق

ترکمن یگید کمسنماز اُوز کیملگنه قوانسا

یالنگیزلیق

کؤپینگ بیری بولیب یاشاسام دا من

یالنگیزلیق دؤیغی سی حکم ادیار مانگا

دورمیش دا چین سرداش تاپاماق چتین

رنگلی یاشماق گؤریان، یوزلارده دینگه

 

اره یار گون دوغیب داغلاردا قارلار

پئنتئقلاب آغاچدا چقیب دور یاپراق

یونه  بوزا دونن غاملی یورگا

دؤیمادیم  قین میکا،  هواندار تابماق

 

کا ماحال اوتیرن کوبدن آیرشیب

دوردیان کونگلیمده خیال دوسسمی

گزیارس بیله جه شاد بولیب باغدا

یل لار هم خوش گچیار هر بیرموسمی

 

گؤرمه گی اوتیرن یالنگیزجه ولین

یانکی دوستم گلیب، کونگلیمی آچیب دور

سؤزلارینگ سؤیجی سین یگ گـُریب  سچیب

مانگا سوغات بریب، تؤره گچیب دور

 

هاچان گلجگ دیب چین لیق دورمیشا

سوراشیان یؤزلانیب خیال دوسسمدان

دیار آرانگیزدا حکم ادسه سؤیگی

هر کیم یولا  چیقسا گِلار اؤستئمدن

کیم میلسنگ آدامی

بیر سقیم پول دیب ایلن ساتمایان

خور ،یتیم ،دول لارینگ مالین اوتمایان

دویبلی برنامه لی گلجگ، دورمیشه

سیلاغ گوزلی باقیان میراث ،گچمیشه

شاد گوننگ خوش بولیب گل تکین گؤلجگ

غام گؤننگ برگ دوریب یاننگدا بولجاق

بلمدن آرتیقماچ دؤشیمدن دولی

آنگلدان یگ بولسین ارنلار یالی

ایل بیلن بیرلشسین بیر تن جان بولیب

خلق دیب یاشاسین خلق دیب اُؤلیب

ایشنگگر هم بولسین باتر پألوان

گونی آچیق،سؤیجی سؤز،جومارد ،مأهربان